Келес ауданының тұрғыны, ел қорғаны атанған, ішкі істер органының ардагері Халық Оразбаев 80 жасқа толды. Осыған орай Полицейлер ардагердің шаңырағына арнайы барып, құттықтады.
Келес аудандық Ардагерлер ұйымының төрағасы Нұрғали Базарқұлов, Келес АПБ бастығының Кадр саясаты жөніндегі орынбасары полиция подполковнигі Саттар Отыншиев зейнеткер полицейге басшылықтың арнайы құттықтауын, «Алғыс хатын» және сыйлықтарын табыс етті.
Халық Оразбаев 1941 жылы дүниеге келген. 1963 жылы әскерге шақырту алып, Хабаровскте отан алдындағы борышын өтеген. Осылайша 1966 жылы әскерден келген жас жігіт, жұмысқа араласа бастады. 1970 жылы Келес аудандық полициясында Мемлекеттік автоинспекция қызметін атқарды. Келес, Сарыағаш, Шәуілдір аудандарында және облыстық МАИ қызметінде басшы лауазымдарында еңбек етті. Ширек ғасырдан астам ішкі істер саласында еңбек етіп, майор шенімен зейнетке шықты. Қызмет атқару кезінде 40-қа жуық марапаттар мен бағалы сый-сыяпаттарға ие болған. Бүгінде зейнетінің бейнетін көріп отырған ақсақал 2 ұл, 9 қызды өсіріп, ұлын ұяға, қызын қияға қондырып, рахатын көріп отыр. Олардан 38 немере, 5 шөбере сүйген бақытты жан.
Ол құттықтап келген полицейлерге үлкен алғысын білдіре отырып, қиын да қауіпті салада атқарған қызметінде орын алған шынайы оқиғалар туралы естеліктерін айтып берді. Әрдайым жас буынға қызметке қажетті ақыл-кеңестерімен беріп, ізбасарларының шыңдалуына септігін тигізуге дайын екенін жеткізді.
ТО ПД-ның баспасөз қызметі
