Биыл Түркістан өңірінде 608,7 шақырым жол салынады. Оған бюджеттен 19,9 млрд.теңге бөлінеді. Осы қаржының діттеген жерге жетіп, жолдың сапалы салынуын «Жол активтері ұлттық сапа орталығы» қадағалайды. Былтыр осы орталықтың облыстық филиалы республикалық маңызы бар 33 нысанды бақылауға алған. 350 рет тексерісіке шығып, 511 кемшілік анықтады. Жылжымалы зертхана көмегімен 328 сынама алынып, оның 20-ы нормативтерге сәйкес келмейтінін анықтаған. Осының нәтижесінде мердігерлер 55,0 млн. теңгеге қайта қалпына келтіру жұмыстарын жүргізді.
Түркістан облыстық жолаушылар көлігі және автомобиль жолдары басқармасының мәліметінше, 2020 жылы автожол саласын дамытуға бюджеттен (54,8 млрд. Т) 55 млрдқа жуық теңге бөлінген. Жыл соңына дейін 828 нысан, нақтырақ айтсақ, 1 525 шақырым жолда құрылыс-жөндеу жұмыстары аяқталып, пайдалануға берілді. Қалған 40 нысан, яғни 449,4 шақырымның жұмысы биыл жалғасады. Айта кетейік, Түркістан облысында автомобиль жолдары мен елді мекен көшелерінің жалпы ұзындығы — 17 286,5 шақырым. Оның 733,1 –і республикалық маңызы бар. 4 152,2 — облыстық маңызы бар, 1 799,8 — аудандық маңызы бар жолдар, 10 601,4 шақырымы елдімекен көшелері.
