Түркістан облысында мал ұрлығы 52,1%-ға азайып отыр. 2019 жылы осындай жайтпен 641 дерек тіркеліп, ашылу мөлшері 55,8 %-ды құраса, 2020 жылы 307 жайт тіркеліп, орын алған қылмыстардың ашылуы 68,8 %-ға артқан — деп хабарлайды Түркістан облысы полиция департаментінің баспасөз қызметі.
Сонымен қатар, жыл басынан бері мал ұрлығымен айналысқан 25 қылмыстық топ құрықталып, 84 тұлға жауапкершілікке тартылған. Олардың 147 мал ұрлығына қатысты екені анықталды. Жалпы облыс бойынша 1317 төрт түлік ұрланса, оның ішінде 502 ірі қара малдар өз иелеріне қайтарылған.
Мәселен, Арыс АПБ-ға арызданған жергілікті тұрғын мал жайылымынан 1 бас айғыры белгісіз жағдайда жоғалып кеткенін көрсеткен. Осы жайтқа байланысты Арыс АПБ-ның тәжірибелі қызметкерлерінен жедел-тергеу тобы құрылып, оқиға орнына жетті. Тәртіп сақшылары жақын маңдағы барлық аумақтар мен жайылымдарды аралап, куәгерлерден жауап алды, сондай-ақ мал таситын автокөліктерді және үй малын сататын орындарды тексерді. Жедел-іздестіру іс-шараларының нәтижесінде, полиция қызметкерлері жоғалған айғырды 5 шақырымдық жерде жайылып жүрген жерінен тауып, иесіне қайтарды.
Сондай-ақ құжатсыз мал тасымалдайтын көліктер де мал ұрлығы қылмысының орын алуына себепкер болып жатады. Осыған байланысты облыс полицейлері қылмыстардың алдын алу үшін рейд кезінде мал тасымалдайтын жүк көліктері мен автокөліктерді, мал сойып ет өңдейтін орындарды да тексеруде.
